منية عرفاوي: قوى سياسية من ورق ..وهذا مخيف !!
كتبت الصحفية منية عرفاوي: قوى سياسية من ورق ..وهذا مخيف !!!
في العشر العجاف نحن لم نكتف بتدمير الدولة،بل الفشل الأكبر هو ان كل القوى السياسية استنزفت نفسها في صراعات جوفاء ومخجلة.. ولم تبن لا أحزاب قوية ولا قواعد وفية..انظر إلى آخر حزب فاز في الانتخابات بنصف مليون صوت ..يعجز ومنذ اشهر على تأمين مظاهرة شعبية حاشدة لتذود عنه وتحمه في سقوطه المدوي ..بضعة آلاف من الغاضبين يشيح ريقهم باش يلوموهم..اي وال 400 الف ناخب ..#وينوهم؟
الحزب الثاني في الانتخابات ..اندثر وانقرض ولم تبق غير #سميرة تمني النفس أن تكون رئيسة حتى وكان في منامة عتاريس !
مفاجأة انتخابات 2019 ائتلاف الكرامة ..إللى مولى الباتيندا متاعو سيف الدين مخلوف قريب يهبط يدور على الشعب بالكفوف م التبوريب متاعو..لا سيب اعلام لا قضاء لا نواب ..صيد مسيب يرشق في الفلوس في زرد البرلمان ..وين قواعده اللي قالو هرب بيهم للنهضة على خاطر فايق وخشين..ما بقالو كان عماد دغيج ساعة ساعة يتفكرو بلايف!
أحزاب اليسار هذيكا من غير ما نحكو..ونقلق راحة الموتى ..ماهو الرفيق وائل نوار متاع حزب العمال قالك احنا ما نلوجوش على العمق الشعبي والانتخابات 😏 على اساس بقية الأحزاب في الديمقراطيات العريقة تخدم وتكلت باش مبعد تربي سمك السلمون في مزارع مائية عملاقة .
بالنسبة للكيان الذي تقوده عبير موسي ..فلا اعتقد انه يخضع إلى المعايير الموضوعية في تعريف الأحزاب ..لا نعرف له لا شخصيات ولا هياكل ..عبير هي لكل وهاذي حتى في الحزب الشيوعي متاع كيم جونغ اون ما صرتش فيه 😏
الأحزاب الباقية لا تختلف لا في الوزن ولا في العمق ..بعضها يحاول ركوب سفينة نوح التي حطمت المرساة وانطلقت دون بوصلة تواجه الانواء والعواصف ..والبعض الآخر يعاند موجة عاتية لن تهدأ الا بسحبه إلى قاع المحيط.
ووجود تجمعات سياسية بكل هذا الوهن و الضعف هو أكبر المخاطر واشدها فتكا لأن من تلك البوابة يتسلل حكم الفرد المطلق عندما لا يجد قوة مضادة قادرة على أحداث التوازن..أنتم تركتم كل أبواب الاستبداد مشرّعة فكفوا عن اللطم والانتحاب.
